सामाजिक कार्य व समाज सेवेचे उपक्रम

या मंदिरात भाव भक्तिपूर्वक महाराजांचे दर्शन घेणाऱ्या अनेक भक्तांचे मनोरथ महाराज फलद्रूप करतात असा अनेकांना अनुभव आलेला आहे. अनेक भक्तांचा महाराजांचे प्रती ओढा वाढलेला आहे. त्यामुळे अनेक भक्त आपल्या शक्तीनुसार न्यासाला सतत देणग्या देत असतात. या देणग्या द्वारे मिळणाऱ्या लाखोच्या निधीचा उपयोग ही ट्रस्ट (न्यास) पुरेपूर, जास्तीत जास्त समाजसेवेचे उपक्रम राबविण्यास करीत असते. भक्तप्रतिपालक श्री गजानन महाराज या ट्रस्ट मध्ये कार्यरत असलेल्या भक्तांना, विश्वस्तांना, अनेक तरुण स्वयंसेवकांना स्वतः प्रेरित करीत असतात. या सर्व भक्तांना लालसा असते, स्वार्थ असतो फक्त महाराजांच्या आशीर्वादाचा..! तीन तपाहून अधिक काळापासून कार्यरत असलेल्या या न्यासाला महाराजांनी कोणताही डाग लागू दिला नाही हेच या न्यासाचे खरे वैभव आहे.